Galo e Jacobo Martínez, tras décadas de paixón polo ocio electrónico, crean o proxecto "Barité Museo" co fin de experimentar e preservar unha pequena colección de dispositivos de videoxogos. Será a semente do futuro MUVI.

Os fondos do proxecto increméntanse de xeito progresivo a medida que a iniciativa explora colaboracións e pequenas actividades empresariais e culturais.

O 2 de febreiro de 2019 nace o MUVI, o primeiro Museo de Videoxogos de España. Os conceptos "cultura" e "arte" son abordados explicitamente na súa inauguración, baixo un notable apoio popular e mediático.

Trala implicación dun grupo de 8 persoas no proxecto, o 2 de marzo de 2020 constitúese a Fundación Museo do Videoxogo de Galicia. O 20 de xullo de 2020 a Secretaría Xeral da Consellería de Cultura e Turismo decláraa Fundación de Interese Galego e ordena a súa inscrición no Rexistro de Fundacións de Interese Galego.

O MUVI medra, tanto en espazos como en colaboradores e liñas de traballo, ás que se incorporan a investigación e as Universidades. Co apoio, patrocinio e protección de empresas como Lares Inmobiliaria, o Concello de Cangas e Balidea, a Fundación culmina a súa visión o 10 de setembro de 2022 coa inauguración e apertura do novo Museo do Videoxogo.

A nova ubicación, infraestruturas e espazos provocan unha revolución do proxecto en impacto social e número de visitantes que volve a experimentar un novo salto adiante. Os centros de ensino comezan a acudir de xeito habitual o Museo e mentres tanto, o número de proxectos nacionais e internacionais seguen avanzando. É a estapa de maior crecemento en tódolos aspectos da Fundación MUVI.

A Xunta de Galicia, a través da Consellería de Cultura, Lingua e Xuventude, asinou o acordo de creación e cualificación para a incorporación ao Sistema galego de centros museísticos do primeiro Museo do Videoxogo (Muvi). No quinto aniversario do proxecto o Museo acada un dos seus primeiros obxectivos fundacionais con gran impacto en medios de comunicación